Кліенты банкаў працягваюць высвятляць, як купіць ідэальную валюту. Дробныя купюры, як выявілася, не панацэя: падступную плесню можна знайсці і там. Беларус Цімафей сцвярджае, што знайшоў спосаб засцерагчы сябе ад куплі даляраў з плесняй.
Мужчына кажа, што некалькі гадоў купляў валюту ў горадзе Камянец Брэсцкай вобласці.
— Купляючы нерухомасць, праверыў банкноты УФ-ліхтарыкам, з іх 15 банкнот на суму больш за 600 еўра і 100 даляраў выклікалі падазрэнні. Аднёс у банк праверыць і не памыліўся: грошай не прынялі. Давялося адправіць у Еўропу. І гэта не першы выпадак са мной: 5 гадоў таму была такая ж сітуацыя падчас куплі аўтамабіля, але там толькі тры банкноты не ўзялі ў банку, гэтак жа адправіў у Еўропу. Цяпер толькі з ультрафіялетавым ліхтаром ля касы правяраю кожную банкноту, — расказвае чытач.
Паводле яго, ультрафіялетавы ліхтарык абышоўся нядорага, амаль 13 рублёў, і свячэнне на купюрах цяпер лёгка заўважыць.
На пытанне, як рэагуюць касіры на такую народную праверку, Цімафей лаканічна адказвае: «Па-рознаму».
Што банкаўскія работнікі думаюць наконт кліентаў з ультрафіялетавымі ліхтарыкамі? Калі каротка: мала проста здзівіць касіра, трэба ведаць усе нюансы праверкі банкнот.
— Проста валодаць інструментам мала: трэба ведаць, якую інфармацыю ён дае і як яе трактаваць.
Касавых работнікаў акурат вучаць усім тонкасцям і нюансам вызначэння сапраўднасці і плацежнасці банкнот, а яшчэ патрэбны пастаянны практычны досвед. У звычайнага чалавека такога досведу, як правіла, няма.
Гэта, дарэчы, да пытання пра разварот дэтэктара валют: ці можна развярнуць яго так, каб кліент убачыў працэс праверкі. Так, практычна гэта магчыма, але кліент не ведае ўсіх нюансаў і не зможа вызначыць, дапушчальнае гэта свячэнне ці не. Касір будзе вымушаны доўга тлумачыць, што ўсё ў парадку.
Яшчэ адзін беларус, Яўген, расказвае, што ў пачатку красавіка здымаў валюту з карткі, касірка хацела выдаць наміналам 100 даляраў, але ён папрасіў драбнейшымі купюрамі, каб пакласці праз cash-in на картку іншага банка.
— Атрымаў 8 купюр наміналам 50 даляраў і 5 купюр па 20 даляраў. У выніку праз 30 хвілін падчас спробы пакласці на карту cash-in пастаянна выплёўваў купюры, давялося звярнуцца да дзяўчат у касе, якія адмовіліся прыняць дзве 20-даляравыя купюры.
Паўторная спроба загнаць на карту з дапамогай жалезнай скрыні, на жаль, не мела поспеху.
— Знайшлі нейкае рашэнне?
— Відаць, пакіну скаргу ў Нацбанк, каб абавязалі банкі ўсталёўваць у латкі выдачы купюр лямпы ультрафіялету для праверкі не адыходзячы ад касы.