Днямі прадстаўнік Аб’яднанага пераходнага кабінета (АПК) па абароне і нацыянальнай бяспецы Валерый Сахашчык заявіў, што Расія і Беларусь рыхтуюць планы выкарыстання тактычнай ядзернай зброі і «бліцкрыгу на Вільнюс». У эфіры «Звычайнай раніцы» ён расказаў, на чым грунтуюцца яго высновы.
— Калі адштурхоўвацца ад фактараў, якія я маю, у цяперашні момант у Расіі праводзяцца вучэнні па дэзактывацыі мясцовасці, пераадоленні ўчасткаў заражэння, забяспечанне войскаў радыяцыйнай, хімічнай, біялагічнай абароны, якія былі ў загоне некалькі дзесяцігоддзяў, — заявіў Сахашчык.
Паводле яго, расійскім навукоўцам пастаўленая задача распрацоўваць больш эфектыўныя сродкі для абеззаражвання і дэзактывацыі мясцовасці.
— З гэтага я зыходжу, што ў планах у расіян ёсць выкарыстанне тактычнай ядзернай зброі. А далей — ужо мае высновы. Думаю, што гэта могуць выкарыстаць супраць Украіны ці, напрыклад, Літвы. Альбо і там, і там. На Польшчу, думаю, пабаяцца пайсці, — лічыць ён.
Сахашчык таксама спаслаўся на тое, што ў яго ёсць разнастайная інфармацыя, частка з якой — «неабвержныя факты». У якасці прыкладу ён прывёў рамонт мастоў у Беларусі на дарогах на літоўскім кірунку.
— У тым ліку мастоў, якія не выкарыстоўваюцца для гаспадарчай дзейнасці. І, у прынцыпе, акрамя як для руху вайсковых калон выкарыстоўвацца і не могуць.
Нагадаем, прадстаўнік Аб’яднанага пераходнага кабінета па абароне і нацыянальнай бяспецы Валерый Сахашчык, выступаючы на мітынгу з нагоды Дня Волі ў Варшаве, заявіў, што Беларусь і Расія рыхтуюцца да выкарыстання ядзернай зброі і «бліцкрыгу на Вільнюс». Адказваючы на пытанне «Люстэрка», адкуль у яго такая інфармацыя, Валерый Сахашчык адзначыў, што яе ён атрымаў ад «крыніц высокага ўзроўню».